被譽為平成三大歌姬之一嘅宇多田光，當年16歲出道就一炮而紅，首張專輯《First Love》至今仍然係日本史上最暢銷唱片，多年嚟創作過多首膾炙人口嘅經典金曲，係唔少人心目中嘅NO.1歌手。現時長居英國嘅宇多田光近日就喺Instagram直播表示，已經受夠「Miss」、「Mrs」、「Ms」等等嘅稱謂，宣布自己係一個「非二元性別者（non-binary）」。

近日宇多田光喺IG直播期間，突然用英文向粉絲介紹身後一隻玩具熊「我要同大家介紹一位朋友，佢叫做kuma，之前我都介紹過好多次，佢係一個男仔同時亦係gay」。跟住就大方承認自己係「非二元性別者（non-binary）」，表示已經受夠日常生活入面要選擇「Miss」、「Mrs」、「Ms」等等嘅稱謂，要明確定義婚姻狀況同性別令佢感到好唔舒服，希望冇指向任何姓別嘅稱謂「Mx.」會得到廣泛應用。

（圖片截自：kuma_power@Instagram）

日本樂壇天后宇多田光出生於美國紐約，父母為音樂製作人宇多田照實及歌手藤圭子，自細就聽「Guns N' Roses」長大，1998年以16歲之齡推出單曲Automatic出道一炮而紅，期後首張專輯《First Love》更賣出共1,100萬張，成功奠定日本樂壇天后地位。曾經喺2011-2015年暫別樂壇，2016年復出後依然狀態大勇，最近就為電影《新・福音戰士劇場版：||》以及動畫《給不滅的你》獻唱主題曲。