自助餐同電影好似唔太拉得埋一齊，但其實凡事唔係絕對的。近日沙田帝逸酒店嘅餐廳Alva House，就同電影《比得兔2：走佬日記》喺自助餐大玩Crossover，當中佢地嘅甜品區將提供多款電影主題特色蛋糕，如果你係比得兔嘅Fans，就無唔去嘅理由啦！

今次Alva House嘅自助餐以海膽及和牛為主題，當中包括令人開胃嘅海膽三文魚子和風沙律，再有火炙A4和牛壽司及海膽海葡萄蝦壽司，和牛嘅油香、海膽嘅新鮮，都真係令人難以抗拒。

唔可以錯過嘅仲有香煎鴨肝配法式牛油麵包多士，鴨肝入口即溶，滿口亦會保留香噴噴嘅油香。而特別推介嘅仲有A4和牛鴨肝海膽炒飯，將三款至矜貴食材放埋一齊，絕對係一次過為你送上三種最頂級滋味。

除左主題食材之外，Alva House亦有即開生蠔、現切刺身、各式烤肉、日式鐵板燒、爐端燒及天婦羅等等，務求令你捧住個肚走。

最後就梗係唔少得甜品，佢地今次聯乘《比得兔2：走佬日記》推出多款電影造型蛋糕，包括酸甜清新的菠蘿椰子熱情果慕絲蛋糕、雲尼拿鮮忌廉蛋糕卷、迷你紅桑子朱古力撻及芝香陣陣的美式芝士蛋糕等，岩晒拎黎打卡啦！