俗語有云：天下無不散之筵席，這兩年大家身邊應該都有不少人離席而去，甚至你自己就係已經或即將離席嘅一個。面對親友離別，心情總係有啲不快，而本地藝術家Tik Ka就以「再見See you」為題，以帶著香港元素嘅創作，承載有神無形嘅「香港情懷」。

早幾年其實我哋都有介紹過Tik Ka嘅作品，例如2017年推出嘅「港產映晝」電影角色雕像，當時就頗受好評，而「Tik ka From East 五周年展——再見 See You」就收集咗約40件Tik Ka自2016年開始創作後嘅水墨、年畫及雕塑作品。當中有靈感來自著名「Meme圖」，再融入粵劇元素嘅《The Cat and Me》；又有以香港常見嘅連鎖快餐，結合東方神佛而成嘅《食好西》系列「雞仙人」、「如來佛堡」等畫作；其姊妹系列，同樣以神佛為骨幹，加入著名卡通人物品牌元素而成嘅《可愛教主》亦會一併展出。

會場中最大型嘅展品，就會係Tik Ka於2020年創作嘅《眾生 Assembly》，以美漫英雄電影嘅大集合場面為藍本，正邪雙方嘅打扮以至場境設計都加入濃厚東方元素。

《The Cat and Me》

《食好西》

《可愛教主》

《眾生 Assembly》

Tik Ka乃係香港土生土長嘅藝術家，創立嘅「Tik Ka From East」系列結合流行文化與東方元素，再以年畫、水墨、陶瓷、書法等方式展現，成為與別不同嘅東西共融。今次展覽則與海港城「SHOUT Gallery」合作，展期由12月4日至12月19日。