近年日本、台灣都興起所謂「vTuber」，亦即「Virtual YouTuber」嘅簡稱，具體而言即係一個真人，利用軟件為自己加上一個「二次元人物」造型再拍片嘅創作者。而呢一股風氣近來亦吹到中國領土，有人創作咗一個名為「熊苹苹」嘅「vTuber」製作影片放上「Bilibili」，結果導致留言嘅數以百位網民用戶被Ban！

圖片：截圖自網易視頻

卻說日前Bilibili上多咗個叫「熊苹苹」嘅vTuber，咁一眾熱愛vTuber嘅中國網民就一齊去佢條自我介紹片下面留言支持，點知轉個頭所有留言網友嘅帳戶都被封。網民估計，可能係因為「熊苹苹」個名與中共領導人習近平、以及佢嘅花名「小熊維尼」近似，於是引來Bilibili嘅封號行動。有中國網民於Reddit討論區中文版留言，指情況就如恐怖片一樣，大家開開心心去玩，結果一個都返唔到黎。

截圖自：Bilibili

但有趣嘅係，留言嘅網民帳戶被Ban，始作俑者「熊苹苹」本人個帳戶反而冇事，只係條自我介紹片冇咗，同改咗名做「苹苹琪派」，更於Bilibili發文指「創視頻純屬個人喜好，非自導自演，我知道網民都是開個玩笑，但普通人就因為B站轉評機制有問題而被騷擾也是挺受不了的，此號不用了88」，證明係全身而退。而有網民就發現，當日「熊苹苹」自我介紹係29歲，而習近平個女習明澤目前都係29歲……