作為父母當然希望小朋友能夠與自己有同一嗜好，所以唔少爸爸喺個小朋友未出世就已經諗定要帶佢睇邊隊波、教佢打咩機，當然唔少得睇咩動漫。而日本教育媒體《おうち教材の森》日前就進行咗調查，詢問大眾們會向中學以下嘅小朋友推薦邊部少年漫畫」，結果十部都係大家耳熟能詳嘅名作。

據《おうち教材の森》公佈，是次調查總共搵黎200名年齡屆乎「10代」至「60代」嘅大眾，當中有近半都係當年親眼見證少年漫畫一飛衝天嘅「30代」。而最受推薦嘅漫畫，就係得77票、由井上雄彥老師創作嘅《Slam Dunk》，而推薦理由就係「可以學到挫折與快樂」、「學習投入運動的態度」、「通過籃球習得熱情的心」以及「學習團體合作」。其次就係堀田由美原作、小畑健作畫嘅《棋靈王》，推薦理由係「可以動腦」、「冇殘忍嘅場面」、「作畫非常漂亮，唔識圍棋都可以睇得好開心」；而第三名就係富樫義博嘅《幽遊白書》，推薦原因係「雖然有少少暴力，但被當中嘅友情感動」、「王道戰鬥漫畫」、「故事簡單易懂」等。

圖片：PR Times

其餘上榜嘅作品順序為《浪客劍心》、《鬼滅之刃》、《One Piece》、藤崎龍老師嘅《封神演義》、香港較少人認識嘅搞笑漫畫《すごいよマサルさん (Sexy Commando Gaiden》、排共同第九嘅《多啦A夢》及《名偵探柯南》以及安西信行嘅《烈火の炎》。如果大家要推薦一部漫畫畀個仔，大家又會揀邊本？