曾被提名去年「最期待遊戲」嘅《哈利波特》主題遊戲《Hogwarts Legacy》即將於下週開售，相信一眾玩家、「哈迷」都非常期待可以進入魔法世界，重拾校園生活。不過近日遊戲開發商就證實，玩家將無辦法於遊戲中體驗青春中最重要嘅一環——戀愛，原因係好老土嘅「中學生不應談戀愛」。

《Hogwarts Legacy》係一款開放世界動作角色扮演遊戲，玩家們將會扮演一個於1800年代入讀霍格華茲嘅魔法學生，並自由探索呢個巫師世界，體驗魔法校園生活。不過，近日遊戲嘅主要編劑Moira Squier就對德國傳媒《GamePro》證實，遊戲內唔會有任何戀愛元素，玩家與其他NPC「去到最遠也只是友情」。

據Moira Squier指出，佢哋係刻意避開任何戀愛元素，而背後原因係，玩家們扮演嘅角色，理論上係一個「15歲的年青人」，而開發商「唔想觸碰某啲話題」。換言之就係開發商認為15歲嘅中學生可以打下怪獸、整下魔藥，甚至接觸黑魔法成為黑巫師，但就唔可以拍拖嘅。

順帶一提，原著小說中，哈利嘅初戀係15歲時與張秋拍拖。

資料來源：SocialBites