自從上個月《薩爾達傳說 王國之淚》出咗後，網絡上就有非常多相關內容，不過當中絕大部份都係玩家利用「究極手」砌飛機、砌高達，基本上冇人真係去救返阿薩爾達公主。近來仲有位外國玩家將隻Game當係《Sims》咁玩，竟然砌咗間大宅出黎！

呢間由「Dasc」砌出黎嘅大宅樓高兩層加天台，外表採用非常簡潔現代嘅設計風格，地下一層為超大客廳，外面就有馬廄及玄關；二樓則係睡房，仲有個連泳池 (按摩浴池？) 嘅陽台；三樓就係廣闊嘅天台，仲有位種下盤栽植物，直頭係唔少人夢寐以求嘅Dream House。

雖然Dasc個YouTube頻道只有76個訂閱，但佢呢條泳池大宅嘅影片自上月21日上傳後，至今已獲得超過10萬次觀看。唔少人都希望佢發佈埋教學影片，等大家可以跟住砌。不過Dasc就表示因為自己已經爆咗機，短時間之內都唔會再玩住，所以教學影片就未必會拍，但就提供咗所需嘅材料清單，大家有需要可以參考。

值得一提嘅係，唔少留言都針對《王國之淚》中嘅砌嘢系統提出建議，有人希望任天堂增加材料上限，等佢哋可以建造更複雜、更大型嘅物件，亦有人希望隻Game嘅DLC會有更多材料，例如室內裝飾、花園物品、不同款式嘅樓梯等等。淨係睇啲留言真係會以為《王國之淚》係隻生活模擬遊戲黎呀！