早前Netflix宣佈，由北村匠海、志尊淳、本鄉奏多等人主演嘅真人版《幽遊白書》將於12月14日播出，而近日就再釋出埋首條預告，從中除咗終於見到些少動作場面之外，更搶眼嘅係一口氣公佈咗多位新角，當中就包括由滝藤賢一與綾野剛合演嘅「戶愚呂兄弟」，以及由町田啓太出演、含住奶咀嘅「小閻王」。

Netflix日本官方YouTube日前公佈真人版《幽遊白書》嘅首條預告，當中除咗展現原作一開始，浦飯幽助遇上車禍離世嘅畫面，以及「桑原」(上杉柊平飾) 、「飛影」 (本郷奏多飾) 及 「藏馬」 (志尊淳飾) 嘅大頭畫面外，仲可以見到幽助被隻疑似喪屍襲擊嘅情節，並展現出少量特效及動作場面，最後仲有幽助使出「靈丸」嘅場面，單論特效黎講應該可以收貨。另外值得一提嘅係，唔知點解成條預告片大部份場口都係夜晚，就算日間場口都略顯灰暗，睇黎視覺上係想走黑間風格。

滝藤賢一及綾野剛出演嘅「戸愚呂兄弟」

町田啓太飾演嘅「小閻王」

靈丸！

預告嘅另一亮點，就係公佈咗多位新角色，當中包括白石聖出演「雪村螢子」、梶芽衣子出演「幻海」、稲垣吾郎飾演「左京」等。不過最搶眼嘅，就係疑似係第一季最大反派、由滝藤賢一 (兄) 「騎」住綾野剛 (弟) 膊頭出演嘅「戸愚呂兄弟」，但出場時間似乎就唔係「暗黑武鬥大會」，亦代表真人版劇情應該會同漫畫原作有頗大差異。

另外預告中亦見到由町田啓太含住奶咀出演嘅「小閻王」，不過就全程以長大成人姿態出現，而且表情似乎非常嚴肅，經典嘅BB造型似乎被放棄。