《機動戰士高達SEED》及《機動戰士高達SEED DESTINY》嘅劇場版續作《機動戰士高達SEED FREEDOM》將於明年1月上映，而繼早前接連公佈三條先行預告之後，近日官方再公佈埋電影海報及勢力圖，令大家一窺劇場版嘅故事。

先講最新公佈嘅電影海報。海報以基拉及莉古絲為中心，右下方則有處於一片頹垣敗瓦之中、背對基拉及莉古絲嘅亞斯蘭以及飛鳥真，而背景就分別係早前已經公佈嘅兩部新機體，分別係由基拉駕駛，可以變身成MA嘅「RISING FREEDOM」，以及亞斯蘭嘅新機「IMMORTAL JUSTICE」。另外值得一提嘅係，海報兩旁分邊寫上「我之中有你」，「你之中有我嗎？」兩句非常「瓊瑤」嘅字句，成個氣氛即刻變咗愛情片咁。

不過透露較多情報嘅，其實係同海報一齊公佈嘅勢力圖及新劇情簡介。劇情簡介指《SEED FREEDOM》故事發於「C.E.75年」，即約《SEED DESTINY》嘅兩年之後，獨立運動以及反調整者組織「藍色宇宙」繼續發起入侵，而莉古絲則擔任「世界和平監視組織Compass」嘅第一任總裁，與基拉、飛鳥真等人積極介入戰爭。但此時從歐亞聯邦宇宙軍獨立嘅新興國家「Foundation」卻對「Compass」發出邀請，對「藍色宇宙」進行聯合作戰。

勢力圖中可以見到大部份主角都屬於「Compass」旗下，而亞斯蘭就同美玲一同效力於源自奧布軍嘅「Terminal」。左下角則為新興國家「Foundation」，當中亦可以見到於第二支預告中有出現過嘅年幼女王。

資料來源：Fami通