正所謂「勞力士無止境」，名錶就係人都想擁有，但真正買得起又買得到嘅人，始終都係少數；但學張家輝話齋「你依家無，但將來會有」——我唔係好「正能樣」咁話大家將來一定會好有錢呀，而係因為有人用AI設計出多款「名錶LEGO」，萬一將來真係被LEGO接納商品化，咁大家屋企都可以放幾隻「撈」做裝飾啦？

先旨聲明，呢堆設計只係外國網民「aislides」用AI圖片生成技術「Dall-E 3」整出黎嘅虛構圖，LEGO官方冇話過要出，甚至設計亦唔係發佈於LEGO官方徵集玩家設計、夠票就真係會商品化嘅「LEGO IDEAS」頁面之上，而係「aislides」嘅個人TikTok之中。「aislides」前後總共出過兩次「名錶LEGO」，當中包括Rolex、Cartier、Audemar Piguet、Richard Mille等多個名錶品牌，甚至連G-Shock都囊括其中。

雖然呢堆虛構圖睇落真係相當吸引，不過概然係AI生成，當然就冇考慮到「LEGO邏輯」，所以仔細睇就會發現大部份設計都冇可能於現實中用LEGO砌到出黎。不過，希望在明天呀，話唔定呢堆AI圖會啟發到某位LEGO大神，真係於現實將設計還原，再得到LEGO商品化——不過到時應該都係要食炒價啦。

資料來源：@aislides on Tiktok