由《Westworld（西部世界）》主創Jonathan Nolan及Lisa Joy操刀嘅《Fallout》真人版劇集將於4月12日登陸Amazon Prime Video。今日官方就率先公開首批劇照，展示動力裝甲、屍鬼、輻射避難所等經典元素，讓一眾Fans先睹為快。

從相中可見身穿避難所制服嘅女主角Lucy、33號避難所領導人Hank、賞金獵人屍鬼以及鋼鐵兄弟會(Brotherhood of Steel)年輕士兵Maximus。故事並非改編自任何一集《Fallout》遊戲，而係借用遊戲嘅世界觀講述一個全新故事。

經典RPG《Fallout》系列以核爆輻射末日世界觀及獨特藝術風格聞名，雖然每集劇情都唔一樣，但世界觀都大同小異，講述平行時空下嘅地球發生核戰，除咗成功進入地下避難所嘅人類能夠躲過一劫，地上大部份生物遭滅絕或因輻射變種，所以廢土上會出現有兩個頭嘅牛、超巨型曱甴、屍鬼等變異怪物。玩家將會扮演一位原本喺避難所生活嘅人類，但基於某啲原因而必需走出避難所，踏上危機四伏嘅廢土展開一場冒險。