來自日本東京嘅眼鏡品牌OWNDAYS早年為慶祝《高達》動畫播出40週年，聯名推出大受歡迎嘅「特大RX-78-2頭型眼鏡收納盒」。而近日佢哋就宣佈「添食」，再次與《高達》聯乘，推出1:7大小嘅「馬沙專用渣古」(簡稱紅渣）頭型眼鏡收納盒，而且今日就可以上官網預訂！

雖然OWNDAYS係賣眼鏡，但今次推出嘅「紅渣眼鏡盒」亦係心機之作。1:7比例下個眼鏡盒大小為 W403 X D357 X H443mm，基本人有人頭咁大個。而且紅渣隻單眼除咗可以左右移動之外，裝入電池後開合時仲會發出紅光，同時播放渣古啟動音效。揭開紅渣個頭頂，再拎走眼睛部份之後就可以見到收藏眼鏡嘅空間，最多可以放4副眼鏡。雖然同早年推出嘅「高達頭眼鏡盒」，可以將副眼鏡直接放喺高達對眼入面相比冇咁方便，亦少咗啲機關感，但亦不失為高達迷嘅收藏品之一。

另外OWNDAYS仲會同時推出兩款分別以馬沙及「綠渣」為主題嘅聯乘普通眼鏡，以及兩款聯乘太陽眼鏡。每款都送印有自護公國徽章嘅皮革眼鏡盒及聯乘眼鏡布。

價錢方面，一口氣打包「紅渣頭」加四款眼鏡嘅「ZAKU-Perfect」 組合要價HK$6490元、「紅渣頭」加兩款馬沙主題眼鏡嘅「ZAKU-CHAR」 組合、或加兩款綠渣眼鏡嘅「ZAKU-ZEON」就分別賣HK $4990元，如果大家只想要個「紅渣頭」呢，就賣HK$3280。但要注意嘅係，即日起可以上OWNDAYS香港網店預購所有包眼鏡嘅組合，但單售紅渣頭就僅限5月17日於OWNDAYS網店發售。屆時OWNDATS 朗豪坊、K11 Art Mall及希慎廣場亦會展示 1：7超大尺寸「ZAKU HEAD CASE」渣古頭特大眼鏡盒。

資料來源：OWNDAYS