備受爭議嘅迪士尼真人版《雪姑七友》在上月底正式煞科，有消息指電影內部試映反應非常熱烈，評分更媲美2019年嘅真人版《阿拉丁》，唔知票房又可唔可以好似《阿拉丁》咁突破10億美元呢？

近年迪士尼積極將旗下經典動畫翻拍成真人版電影，並與時俱進大執劇情，迎接現代普世價值觀。而即將推出嘅真人版《雪姑七友》亦唔例外，搵嚟拉丁裔女星Rachel Zegler飾演白雪公主，起初更打算用真人演員扮演「七隻魔法生物」取代原作「七位小矮人」，但唔知係咪被人鬧得太勁，最後迪士尼都係改返用CG製作七位小矮人，更貼近原著形象。經歷罷工潮延期及補拍後，電影終於喺上月底完成拍攝，預計2025年3月21日正式上映。

最近有消息指，經過多次補拍後嘅《雪姑七友》試映反應非常不錯﹐唔少人都點名大讚Rachel Zegler表現，內部評價更媲美2019年嘅真人版《阿拉丁》。據外媒《Forbes》推算，由於進行了多次補拍，電影製作成本已上升至2.09億美元，估計票房至少達到3.4億美元先能夠回本，考慮到更具爭議嘅真人版《小魚仙》亦能斬獲5.69億美元票房，估計《雪姑七友》應該唔使蝕嘅。