卻說早幾日於一個台灣專頁「提督大人與他的餅」中，睇到幾張滿清末代皇帝溥儀嘅生活照，其中一張駭然見到佢坐喺一支直立隊住佢Pat Pat嘅木棍之上，有人解釋先知道原來支「棍」係當年流行嘅便攜座椅，英文叫「Pursuit Seat」。咁啱得咁橋，Rolls-Royce就公佈咗一張極有貴氣嘅「Pursuit Seat」唔知大家有冇興趣做現代嘅溥儀呢？

圖片：Rolls-Royce

所謂Pursuit Seat，其實就係一張只有一隻腳，上半部份可以打開摺埋嘅座位，目的就係提供一個方便，而且不受地型限制嘅流動座位。而Rolls-Royce推出嘅呢張Pursuit Seat，座位部份用上拋光鋁架構，再加一塊珠面皮，唔用時可以摺埋，而張櫈腳就用上碳纖以確保輕便性及堅固度，底部就有固定用嘅釘腳。Rolls-Royce官網就話呢張櫈係用於「一趟未知嘅旅程」、「一插落地就可以隨時坐低欣賞自然景色」，仲設計到啱啱好可以放喺Rolls-Royce嘅車尾箱之中。

圖片：Rolls-Royce

咁你問呢個世界有幾多個買得起Rolls-Royce嘅人，會揸住架Rolls-Royce載住呢兩碌嘢去一個「未知嘅地方」，個地方仲要冇櫈坐所以佢要開呢張嘢出黎？係唔多架，但Rolls-Royce亦好明顯唔係賣緊功能，而係賣緊一種「大家都去行山，你行到攰要踎，但我就有張好型嘅櫈坐」嘅生活態度。咁計法，8,800美金一張唔貴呀。