梁雨恩Cathy，曾經係一名香港女歌手，如今已經成為一名全職飛鏢手，甚至長期佔據香港第一女鏢手位置。2016年，Cathy作為香港飛鏢隊代表成功喺軟式飛鏢世界盃擊敗美國隊奪得冠軍，為港爭光。

飛鏢生涯

現年33歲嘅Cathy，喺2013年一個偶然嘅機會接觸到飛鏢，當時嘅佢喺一個教會年輕人中心見到飛鏢機，並在好奇心嘅驅使下，詢問當時在其身邊唯一一位對飛鏢有認識嘅藝人朋友，叫對方帶自己去買一套飛鏢嘗試玩下。

當擁有左屬於自己嘅一套飛鏢之後，Cathy表示隨即好想嘗試掟鏢嘅滋味。不過，Cathy掟中第一次紅心卻花左佢唔少時間，而成功掟中紅心一刻令佢擁有莫名嘅興奮，並帶比佢好大嘅成功感。

能夠由興趣突然變成職業當然唔係你想就得，Cathy亦都唔例外，可能佢對飛鏢真係有天份嘅，但亦都需要有高人指點。Cathy透露，自己初期接觸飛鏢時，經常喺飛鏢機上見到一個男人 - Paul Lim，後者係住喺香港嘅新加坡飛鏢傳奇人物，佢經常夢想對方可以收自己為徒，將其畢生功力傳授比佢，咁佢自己就可以成為好似對方一樣嘅世界冠軍。

幸運嘅係，Cathy真係喺一個飛鏢道場嘅老闆介紹下，成功認識Paul Lim，其後與Cathy以鏢會友下，覺得Cathy真係幾有天份，亦形容Cathy血液裡有飛鏢嘅直覺，所以最後真係收左佢做徒弟，展開自己嘅飛鏢生涯。

熱愛飛鏢

飛鏢可能你睇只係企喺度連續掟3鏢，然後不斷重複，但Cathy就形容呢件事係會令人上癮的，佢自己喺接觸飛鏢嘅第一年，每日花喺掟鏢嘅時間差唔多6-8小時，除左練習就係參加大大小小嘅飛鏢聯賽。

最深刻的比賽

上面提到，2016年Cathy作為香港隊代表之一參加軟式飛鏢世界盃，而呢次比賽亦都係佢目前最深刻嘅比賽。作為初生之犢，Cathy本來都唔抱太大期望，心裡只係諗住掟得幾多得幾多，但係又比佢同隊友一步一步晉級，最終殺入決賽面對美國隊。

能夠上台參加決賽，Cathy本身已經覺得非常不可思議，最後更喺決勝局擊敗美國隊奪得冠軍，對於佢黎講簡直係好似發緊夢咁。更令Cathy難忘嘅係，由於當年比賽係喺香港舉行，眼見台下全部鏢友全力支持，感覺非常熱血，亦感覺到鏢友們對飛鏢嘅愛。

信仰改變心態

唔好睇Cathy好似喺飛鏢界好成功，回顧當年作為歌手嘅佢喺娛樂圈經歷大起大跌，人生跌入低谷，事業前途亮起紅燈。處於低谷嘅Cathy開始思考個人價值及存在嘅問題，並有天突然對天質問：「耶穌你究竟堅定流架？如果你係堅嘅，你就證明比我睇啦笨。」

點知就喺Cathy向天質問完後，就有一個藝人朋友send左一個訊息比佢，邀請佢參加歌手團契，令佢覺得應該唔係巧合，係上帝透過呢個朋友話比Cathy知佢係真實存在的。

回顧自己嘅信仰，Cathy認為最大幫助係可以認定自己是誰，因為人總係有質疑自己嘅時候，會好想有野可以證明自己嘅存在，而基督教嘅信仰就令佢可以接受自己嘅價值，去擁抱一個唔完全嘅自己。