上月岩岩由奧地利球隊薩爾斯堡紅牛加盟利物浦嘅日本球員南野拓實，終於迎來紅軍首戰，喺足總盃面對愛華頓嘅比賽中，南野以正選前鋒身份上陣，雖然最終未能夠獲得入球，但紅軍仍然以一球小勝對手晉級，而領隊高普亦非常滿意南野嘅表現。

現年24歲嘅南野，今場作為球隊正前鋒，雖然身型較輸蝕，但卻非常落力於場上跑動搶波，只係可惜未能攻入加盟後嘅第一球入球，並且於下半場70分鐘被張伯倫入替，就係咁南野完成左自己喺紅軍嘅首場比賽。

對於南野加盟紅軍後嘅第一戰表現，領隊高普非常滿意，直言佢正正係球隊想要嘅人，又指今場只係南野加盟後上陣嘅第一場比賽，球隊今場派出嘅陣容又只係合練過兩節，所以能夠表現出咁嘅默契已經相當唔容易，而高普亦都肯定左南野嘅技術出色及態度傑出。

而下半場南野被換走，高普表示並唔係唔滿意對方表現，反而係因為南野於比賽中積極走動，雖然佢睇落去唔攰，但礙於對佢未係非常了解，加上佢接近一個月無落場比賽，所以將佢替換落場會較好。

能夠吸引利物浦將佢收歸旗下，南野嘅技術絕對係令人期待，相信只要佢進一步適應利記嘅踢法，加上默契提升，未來再現好似踢紅牛時期嘅出色表現絕對係指日可待。