點解人人爭住去英國踢波？點解咁多球星非英超不去？點解咁多人學英文？真係唔滾唔知身體好，唔睇唔會人工高，睇完呢份薪酬報告，英國阿媽都會明白個囡要嫁，一定要嫁球星。

查實，呢份新鮮出爐報告只收集英冠、英甲和英乙的數據，但由此推斷，英國職業足球真係炙手可熱，難怪球壇中人皆趨之若鶩。首先，英冠球員平均年薪150萬鎊，約3萬鎊周薪，其中有球員的周薪達到6.8萬鎊，足以每個月買一輛跑車。

其次，論資排輩的話，英國球隊的薪酬順序為領隊、助教、一隊教練、門將教練再到體能教練等，但有英冠體能教練的年薪就超過19萬鎊，接近200萬港紙，亦是整體水平的3倍！咪別以球衣管理員係「低端」工作，英冠有球隊為球衣管理員開出5.6萬鎊年薪，月薪有成4.5萬港紙。

講返整體水平，英冠球員年薪是英甲的6倍，英甲和英乙分別為25萬鎊和11萬鎊，而英冠領隊年薪為88萬鎊，約為英甲的4倍。球探方面，英冠首席球探的職位，原來都有6.5萬鎊年薪，而英甲英乙就非常接近，都是超過3萬鎊，畢竟球探工作相對輕鬆，隨時有免費波睇，薪水已經非常吸引。

不出意外，管理層是最好搵的工作，英冠CEO平均水平約30萬鎊，但有球隊就開出74萬鎊，獨佔鰲頭。負責球員買賣的足球總監，平均年薪為19萬鎊，不過不失，相比起來，管理財務的文職員工就幾筍，平均超過11萬鎊，即係每年都搵到「一球」港紙。英國網民認為，報告顯示英格蘭球壇的錢實在太好賺，但是經過呢波武肺疫情後，呢片印印腳的繁華盛世，將會一去不復返。