足球界近年相繼引入更多高科技產物，好似VAR就協助球賽進行判決，場邊亦出現AI人工智能攝影機自動追蹤足球動向，免卻人手控制攝錄機，除左慳咁個人手之外，可能就係減少好似當年伊巴謙莫域連攝錄機都Fake埋嘅情況。

不過始終運用喺足球嘅人工智能依然屬於新技術，所以少不免會出錯，就好似近日蘇格蘭一場直播賽事就發生笑爆咀嘅情況。

講緊嘅就係Inverness Caledonian Thistle FC (恩華尼斯) 球場所採用嘅Pixellot AI攝錄機，呢個AI竟然將當時嘅一位光頭旁證個頭誤認為足球，然後差唔多全場嘅鏡頭都追蹤住呢位旁證個光頭！

從下面嘅精華影片中可以睇到(真係比賽嘅片段)，就算足球喺鏡頭前面出現，但鏡頭仍然會主力追住個位光頭旁證嘅頭部，真係追得好貼架！

而搞笑嘅係，呢場係一場付費直播嘅比賽，亦即係話睇緊直播嘅球迷全場基本上都係睇住旁證個光頭，睇怕就算係入球都應該睇唔到，比錢睇足90分鐘光頭，呢個咁心理陰影面積唔知有幾大呢?