「百發百中」，呢個用黎形容人家命中率好高嘅成語，大家都知道係略帶誇張成份，而唔係真係講緊「射咗一百下又中咗一百下」。不過如果用「百發百中」黎形容今季傷癒復出嘅金州勇士球星Stephen Curry練習時嘅三分命中率，就完全冇誇張成份，而只係一個陳述句！

5+ minutes without a miss.

Stephen. Curry. pic.twitter.com/8DV0z5gtib

— Golden State Warriors (@warriors) December 26, 2020

金州勇士嘅官方Twitter日前上傳一條Curry練習底線三分嘅片，驟眼睇其實係幾悶，就係睇住佢接波、跳投、入、接波、跳投、入咁，但神奇就神奇在Curry喺呢條長5:13嘅片中射咗104球，除咗最後一球外全．部．入．哂，而根據勇士所講，一開始仲有兩球入咗冇拍到，換言之Curry呢五分令鍾連續入咗105球底線三分！

圖片：Wikipedia

而據勇士教練Steve Kerr所講，連續入105球三分對Curry黎講都係一個新紀錄，「我記得佢之前個紀錄係77球。佢都痴鬼線，我唔知健力士世界紀錄仲存唔存在——我細個好鍾意睇佢哋本書——如果仲存在嘅話Curry就應該上榜啦，我哋仲有片為證！」

至於因傷而冇參與練習嘅Draymond Green接受訪問時就話，「我完全唔懷疑Curry做到呢件事，我唔使睇片都知佢做到。我成日都話佢係史上最勁射手，勁到我唔可以扮覺得驚訝，因為一啲都唔驚訝……如果你話我知呢個世界有人連入105球三分，咁呢個人就一定係Steph，因為佢做得到，任何有關射籃球嘅嘢佢都做得到！」