今年2月時，Gucci就宣佈會與Adidas推出聯乘，並會於6月7日開賣，早前官網上亦更新咗Lookbook、全系列介紹及售價，但有中國網民就發現，系列中有把遮，竟然係寫到明唔防水嘅。

Adidas X Gucci聯名系列以懷舊學院運動風為靈感，整個系列中有大量休閒T恤、運動服、運動鞋之類嘅單品，其中仲有兩把色彩鮮艷，印上聯乘系列Logo嘅聯名傘。但有中國網民就發現，官網上顯示其中一把賣11,100人仔 (即約HK$13,000)嘅聯名傘，其商品細節竟然寫到明把遮唔防水。

平心而論，呢把傘面用上混紡物料，再印上密麻麻雙G標誌加三葉Logo嘅聯名傘，的確係非常好睇，萬幾銀嘅售價似乎亦冇人真係會拎佢出去擋雨，但作為一把遮唔防水又的確係幾令人奇怪。據說中國網民曾經向Gucci官網客服人員查詢，而客服人員就話把遮集合兩大牌品豐富而悠久嘅歷史，有收藏價值，適合「於都市或渡假的造型中脫穎而出」，但就「不建議您當做日常晴雨傘使用」。

咁如果你話你好鍾意呢個系列，而且好想有用佢哋啲遮黎遮雨咁點算呢？系列仲有另一把聯合「座椅傘」，唔單止個柄可以打開當櫈坐，個商品細節都冇話唔防水 (但亦冇話防水)，不過就貴啲，要14,390人仔 (約HK$17,000)。

資料來源：Gucci