「唔似啲花靚仔，著埋啲T-shirt 五顏六色仲帶埋啲卡通錶，一啲男人味都無！」相信唔少男士細個睇《賭俠》個陣都曾經聽過張敏講呢一番說話，仲比呢句深深影響咗，覺得成熟、Men 嘅男人係唔應該戴卡通錶。

不過，世界足球先生美斯早排就親身打破呢個過時嘅既定想法！

早前美斯喺出席美職聯國際邁阿密（Inter Miami CF) 對紐約城（New York City FC）嘅比賽現場時，手上戴住一隻蜘蛛俠手錶，即刻引起唔少傳媒嘅注意，到底呢隻錶係咩來頭？

呢隻蜘蛛俠手錶並唔係普通嘅卡通錶，而係由伯爵（Piget）推出，價值 21萬美金嘅皇家橡樹概念系列陀飛輪手錶。手錶採用 42mm 鈦金屬錶殼，搭配黑色陶瓷錶圈同錶冠，手錶裏面嘅2974 手動上鍊機芯透過藍寶石水晶玻璃鏡面呈現出蜘蛛俠好似騰空懸浮咁嘅效果。

不過留意返，呢款蜘蛛俠 AP 全球限量250隻，所以唔係有錢就一定買到。

據說 Messi 去咗美國後就愛上Marvel，唔單止有段時間襯兩個字放假果時同佢哋晚晚睇Marvel電影，而且仲係入波之後模仿 Marvel 角色慶祝。喺幾個月前對夏洛特嘅北美洲聯賽盃八強比賽之中，佢就係入波之後模仿蜘蛛俠慶祝，睇得出係一個不折不扣嘅 Marvel 迷！

所以話，男人唔應該太過在意其他人對你嘅睇法，就好似美斯咁公開戴上呢隻蜘蛛俠手錶，只要係自己鍾意嘅事物，就應該放膽追求，可能咁，會為你嘅生活帶來一種意想不到嘅喜悅。