任天堂今日喺官方網站宣布，未來幾日將會為Switch主機進行更新中文化系統語言。等咗咁耐，面世至今近兩年嘅Switch終於支援中文系統語言，玩家只要喺幾日後將Switch主機語言更新，之後就能夠顯示中文。

任天堂官方網站指出，要新增中文到Switch主機嘅支援語言時，需要將主機系統更新至最新版本(即將公開下載)，而進行Switch主機更新後，要喺主機嘅語言設定中選擇「繁體中文」或「簡體中文」。任天堂續指，目前正準備Nintendo Switch主機之「地區設定」及「Nintendo Switch Online」等相關更新，請耐心等候。

Switch於2017年3月發布，喺去年十月全球總銷量更突破2000萬部，有外國調查機構甚至預期Switch全球銷量將超越PS4嘅龍頭地位，不過相信Switch多咗中文系統語言，可以更輕易打入中國遊戲市場。