日本LAWSON新出「沒有蛋糕的蛋糕卷忌廉」

文：米　　圖：互聯網
POSTED ON 05 Nov 2018

好多人都鍾意食忌廉蛋糕卷，鬆軟嘅蛋糕包住又軟又滑嘅忌廉，真係超級好味！不過相比起外層嘅蛋糕，似乎更多人對香甜嘅忌廉更冇抵抗力，好似食極都唔夠咁，就連包裝紙上掂到嘅忌廉都要奶埋佢先夠皮！如果你都同樣熱愛忌廉蛋糕卷裡面嘅忌廉，咁LAWSON新出「沒有蛋糕的蛋糕卷忌廉」，一定勁啱你心水！

日本連鎖便利店LAWSON新出「沒有蛋糕的蛋糕卷忌廉」其實係叫做「プレミアムロールケーキのクリーム」意思係頂級蛋糕卷的忌廉咁解，開賣前就已經引起話題，而開賣之後更引嚟大把人搶購，加上係「限量」商品，唔少人一買就幾盒幾盒咁帶返屋企，所以而家喺LAWSON都幾難搵到「プレミアムロールケーキのクリーム」，巴打去日本LAWSON時如果見到有，真係唔好考慮，要即刻入手試試佢！