曾幾何時，空姐乃係唔少女仔嘅夢想工作，亦係最能引起男性幻想嘅職業之一，不過近年疫情搞到好多空姐都冇工開，唔少人都轉咗工。而今晚要為大家介紹嘅呢位「華村あすか」，曾經亦有一個空姐夢，亦同樣地中途轉咗工，不過就係轉咗做更能引起大家幻想嘅寫真女星！

現年24歲嘅華村あすか，早於2017年時去東京旅行時，就已經於原宿被星探發掘而入行，不過當時嘅佢其實係一心想做空姐，冇打算真係加入藝能界。好在佢喺同年8月為《週刊Playboy》拍攝嘅首輯水著寫真大受歡迎，搞到雜誌火速邀請佢於11月再拍一輯，同年仲拎埋由集英社舉行、號稱寫真界總選嘅「グラジャパ!アワード2017」最佳新人賞，先令佢改變主意成為寫真女星，一心於藝能界發展。

華村あすか初出道時以一頭黑長直長髮嘅清純形象示人，加168cm嘅身高以及頗有睇頭嘅身材，除咗於寫真界打出名堂，更好快有機會參與戲劇演出，而佢亦開始寫真、演員雙線發展，目前上映中、由長澤雅美主演嘅劇集《エルピス―希望、あるいは災い―》亦可以見到佢嘅演出，或者好快佢就會專心演員而放棄寫真，大家有得睇好睇多啲啦。

IG：hanamura_asuka