話咁快又到年尾，呢一年你過成點呀？人生有咩唔同到呀？如果你拎呢個問題去問今晚要介紹呢位「冴木柚葉」嘅話，佢大概會同你分享一個頗為夢幻嘅故事。因為佢於一年內，由一個電腦都唔識開嘅素人，先成為一個YouTuber，再於上星期趕上尾班車，正式加入寫真女星嘅行列！

現年23歲嘅冴木柚葉，細細個就已經係個電影迷，小學六年級時睇完三浦春馬以及多部未華子主演嘅漫改電影《只想告訴你》之後，就因為深受感動而立志成為演員。長大後嘅冴木柚葉亦的確有住非常上鏡嘅面蛋，不過直到2022年前，佢大約都只係一個「網紅」嘅程度。

踏入2022年冴木柚葉先開設咗自己嘅YouTube頻道，據佢講一開始佢連電腦都唔識開，但依家已經可以自己拍攝、剪片。4月時佢仲成為日本長壽情報節目《王様のブランチ》嘅記者，令其更廣為人識。近日仲首次為《週刊Playboy》拍攝初水著寫真。睇到佢甜美可愛嘅笑容加上頗有睇頭嘅身材，相信佢嘅人氣將會再進一步啦！

IG：yuzuha_saeki