當年疫情期間，大家出街要戴口罩、要不停用酒精搓手、又唔敢出街食飯，真係諗返都覺得辛苦。但辛苦還辛苦，有良好嘅衝生習慣始終係件好事，而且仲可能令你符合今晚要介紹呢位「千葉祐夕」嘅理想對象，用呢個角度諗，好似又辛苦得幾值喎！

現年21歲嘅「千葉祐夕」，最早於2019年就已經參加由《Modelpress》舉辦嘅高中生選美「女子高生ミスコン」，成為「高一」組嘅總冠軍。2021年佢又參加日本著名高中生戀愛節目《今日、好きになりました。》進一步拓展知名度，去年仲成為《週刊Magazine》舉行嘅寫真選美「Miss Magazine」總冠軍，開始佢嘅寫真生涯。咁順理成章地，佢就開始為雜誌拍攝寫真、做下訪問咁啦。

上月佢就首次登上《週刊Playboy》拍攝寫真，而於訪問之中，佢就透露自己一個不為人知嘅秘密，就係佢成家人都有潔癖。例如佢本人其實好鍾意浸溫泉，但就因為潔癖怕掂到人哋沖過嘅水，所以去親都要踮腳行入去；出街食飯時除咗會抹哂所有餐具，仲會因為覺得啲杯唔乾淨而自帶水壺，如果餐廳唔提供水佢就成餐飯都唔飲水，食完先去買樽裝水飲。另外佢唔可以去車站嘅廁所，喺屋企食完飯要即刻洗碗，反正就係一個非常「潔身自愛」嘅女仔。

佢仲話希望搵個同佢一樣鍾意乾淨、唔可以唔沖涼就上床瞓覺嘅男朋友。聽落係有啲麻煩，但如果「千葉祐夕」係你女朋友，相信大家都會好樂意咁做？

IG：yuleaf_0828