喺日本寫真界，寫真女星改名並唔係一件非常罕見嘅事，有時係因為個人原因，有時係因為舊藝名屬於經理人公司，所以轉公司就要轉埋名。好似今晚要同大家介紹、今日生日嘅呢位「田村愛美鈴」咁，佢就曾經用過三個名進入寫真界！

今日24歲生日嘅「田村愛美鈴」，最早於2013年就以「飯田愛美鈴」拍攝水著寫真出道——冇錯，當年佢只係得13歲——但只係出咗一隻寫真DVD後，佢就改投另一經理人公司，並於2015年再以「佐藤すずか」之名推出人生第二隻寫真DVD，結果又係一片而止。時間快轉到2018年，佢再次改名，以目前用緊嘅「田村愛美鈴」加入偶像樂隊「THE COINLOCKERS」，成為主唱之一，直到2021年團體解散，佢嘅演藝生涯再次中斷。

上面短短呢幾句，你就知「田村愛美鈴」過去10年嘅演藝之路都係走得跌跌撞撞。2021年團體解散之後，佢拍過網劇、演過舞台劇，仲參與過電影演出，但人氣依然冇咩進展，所以最近佢又重操故業，第三度進軍寫真界，先後為集英社旗下嘅《週刊Young Jump》及《週刊Playboy》拍攝水著寫真。唔知你睇完佢啲相，又覺得佢今次能否順利走落去呢？

IG：amiri_tamura