馬來亞春色檳城之花翁依玲

文：MenClub 魏文青　　
POSTED ON 25 Jan 2016

「馬來亞春色」呢個系列，文青開咗個頭，竟然冇繼續寫第二篇…實在係我唔啱！所以我特登又搵下有咩馬來西亞美女可以介紹比大家。然後就比我發現，原來有一個，我老早就同大家提過個名，但係又冇詳細介紹過－－佢就係有「檳城之花」嘅馬來西亞女歌手翁依玲(Diorlynn)！
左邊係何戀慈,右邊就係翁依玲啦
點解話我一早就提過佢個名？事關上次我介紹同樣黎自馬拉嘅「何戀慈」嘅時候，曾經講過一套「女女」微電影「Abandoned」，而嗰「女女」嘅另一個女，就係翁依玲啦！佢係成為歌手之前，其實就一個模特兒黎，仲曾經參加過N個大大小小嘅選美比賽，仲曾經拎過好幾個冠軍，之後就有出演MV、短片、廣告，以及各大雜誌嘅封面模特兒等等。轉職成為歌手之後仲曾經被香港報紙報導過－－因為佢出咗隻歌叫做《我好天真我好傻》，抽邊個水好明顯啦下話？

叫得做「檳城之花」，翁依玲就應該係個靚女黎嘅。不過睇返近年關於佢嘅報導，就似乎唔太正面。除咗有網民指佢個樣有後天加功之嫌，更有「拋棄糟糠」嘅罪名。話說翁依玲一直有一個拍咗拖七年嘅男友「黑皮哥大澀Ken」，但自從佢上年年頭與同公司嘅男藝人「Mr.達人」黃勁達拍過《我好天真我好傻》嘅MV之後，佢兩個就經常Post出親密照，繼而傳出緋聞。之後翁依玲宣佈與男友分手，到九月尾就公開與Mr.達人已經拍咗拖幾個月，屈指一算就即係嗰頭分手嗰頭就拍拖。

所謂家家有本難唸的經，件事係咪如某大馬網民所講「有綠光」，我哋呢啲外國人就無從判斷架啦！不過我又必須承認，見到佢哋成日放閃光彈又的確令人幾頂氣嘅！
Ong Yi Lin on facebook Diorlynn on instagram