【老將不死】籃球版三浦知良 - 47歲折茂武彥

文：MenClub 波特先生　　圖：互聯網
POSTED ON 20 Oct 2017

對於唔少球迷黎講，三浦知良可以話係日本足球界嘅傳奇，呢位日本足球巨人雖然已經50歲，但仍然喺日本聯賽繼續上陣沒有掛靴，十足十傳說一樣。而其實喺日本籃球界亦都有一位同三浦好相似嘅球員，佢就係折茂武彥(おりもたけひこ，下稱折茂)，一位已經47歲嘅球員。

對比起足球，籃球更講求攻守轉換嘅速度，球員們總係要不斷來回跑，所以年紀大嘅球員好快就會被淘汰，因為佢地嘅體能開始下降，已經跟唔上比賽嘅速度。不過，呢位折茂卻係例外，47歲嘅佢至今仍然喺日本最高級別嘅籃球聯賽JBL征戰，去年年底更加創下日本籃球聯賽一個紀錄，就係生涯成功取下9000分，成為日本本土球員中首位達到嘅球員。

折茂身高1米90，體重77KG，喺場上司職得分後衛，佢擁有一手出色嘅投籃技術，表現相當平穩，因此能夠長期征戰至今。除左投籃，折茂仍然保持一定嘅速度，喺比賽入面突破上籃仍然屢見不鮮，唔講你可能根本唔覺佢已經47歲。

唔好以為47歲嘅折茂係球隊嘅大後備，佢上季仍然為球隊上陣60場，上陣時間達到場均19分鐘，並且能夠取得8.9分，三分球命中率更高達44.4%。即使黎到今季，佢仍然有16.8分鐘嘅上陣時間，場均可以取得7.8分。

以折茂嘅狀態，相信佢仍然可以繼續征戰一段時間，真係要到有一日佢真係跑唔郁，體能唔能夠再支持佢征戰日本聯賽嘅強度，我估個陣時佢先會真正咁退落黎。而呢份堅持，證明佢真係有幾咁愛籃球呢項運動！