男人的浪漫，不外乎「豆腐火腩飯」以及「被包食軟飯」。根據非正式統計，做鴨，極有可能係大多數男人嘅終極夢想。但呢份Dream Job就好似鬼魂咁，大部分人都係得個聽字，冇咩人親身接觸過呢個行業。究竟男人是如何做鴨嘅呢？依然充滿著許多謎思。

《鴨王》主角何浩文Dominic，其實係筆者中學時的師兄，當年佢已被封為校草，風靡萬千妹妹仔，得悉Dominic今次以新人姿態擔正，仲要有咁多大膽裸露鏡頭，著實震驚不少當年嘅小粉絲（包括本宮）。由一個校草「淪為」鴨王嘅心路歷程係點，做鴨又有咩取悅女性嘅招數？

以下將向大家訴說一個校草變成鴨王的故事。

學校裡的萬人迷「Homan」

《鴨王》男主角何浩文成為Dominic以前，係一個叫Homan的青澀男生，於名校出身，擅長各種運動，即使當年冇一節節結實的二頭肌三頭肌，靠標緻五官燦爛笑容，已迷倒不少妹妹仔。何浩文中五畢業，一眾三唔識七嘅學生妹蜂擁而至要求同校園王子合照，只為放上Xanga曬吓命，抽吓水。Mean娜問到，何浩文呢個校草當年是否已想入娛樂圈？Dominic搖頭苦笑，如果唔係採訪遇到這位師妹，都唔知自己曾經有「校草」呢個身份，入娛樂圈？真係冇諗過。

「Dominic」的誕生

何浩文從「Homan」變成「Dominic」，是中五畢業後的事。畢業後去英國讀書，回港後何浩文去學跳舞，之後成為排舞老師。當時有人睇中何浩文舞技不俗，亦幾英俊，發掘他與袁駿傑、喇英和楊尚斌，在2008年組成男子跳唱組合Bro5。

Dominic=糖妹的前男友？

Search「Dominic」，最先彈出嘅相關資料都同糖妹有關。冇錯，好多人對Dominic嘅印象都只係「糖妹男朋友」，Dominic實際做過咩，未必人人知。Dominic亦認同，入到娛樂圈後，成績未如所想。不過，亦非部份人所講，「Dominic冇做過嘢」。佢好清楚自己正在進步，所謂嘅「未如理想」，係因為自己野心太大，每升一級就會再望高一級，達不到自己目標，所以令自己有壓力。Dominic坦言︰「我喺呢行冇底線，所以會作出好多大膽演出及嘗試，因為專業，所以喺鏡頭面前畀晒所有嘢觀眾。」事實證明，Dominic打動了王晶，獲得晶哥捧為下一任任達華。

做鴨又有咩好怕喎？

話就話因為專業，所以拍咩都冇有怕。但由校草變鴨王，Dominic真係完全冇心理負擔？「有心理壓力架！」嗱嗱嗱！都話有架啦！係咩先？「怕凍，因為拍《鴨王》天氣剛剛轉涼，所以除衫前好大壓力。」喂！認真啲好喎！Dominic笑說︰「其實男仔除衫冇咩蝕底，只要有作為演員嘅專業就唔會怕，當時怕就怕自己太瘦唔上鏡，因為拍攝前一個月，晶哥話我太大份，成日擋住鏡頭，所以我絕食減肥，但自己又鍾意好似健美先生咁大隻，所以成日覺得自己太瘦！好彩上鏡效果好好。」

動情不動L

拍攝《鴨王》，要與眾多美女埋身肉搏，Dominic就表示佢好叻豬，控制到自己冇動L，冇尷尬。原來，唔動L唔困難，唔動情先最困難……「戲入面何佩瑜Jeana飾演我女友，角色上我好鍾意好鍾意Jeana，有時我會無啦啦眼定定望住佢，Jeana就會問我做咩嘢先～？我就答佢︰『冇呀，望吓你』」咦？咁會唔會戲假情真，抽唔到身呀？「始終呢個唔係啲精神病角色，要抽離唔難嘅，不過要啲時間。」嗯……唔知Dominic如果要為抽離嘅時間設一個限期，會唔會係一萬年呢？

鴨王如何取悅女性

拍完《鴨王》，Dominic理應學識好多取悅女性的絕學，但原來做鴨，同我哋想像中係差好遠的。Dominic話︰「其實身為一隻鴨，係唔需要去氹女仔，而係去開解女仔，填補佢哋心靈上嘅唔滿足。我問過啲搵過鴨嘅朋友，佢哋都認同鴨更似心靈輔導員，有時有啲嘢，唔想同最親嘅人分享，寧願畀錢買個聆聽者，呢頭講完嗰頭散，對雙方都有保障。鴨唔係好似我哋所想，一定要提供性服務。」即是話，如果你想個女人開心，與其花咁多心思追佢，不如好好聽佢講嘢會更有效吧？

What can I do to be a Duck Duck？

講完一大輪，相信由始至終渴望食軟飯嘅你，最想知嘅就係點先可以做到鴨。Mean娜本以為要型英帥靚正先有條件做鴨，但Dominic就話你知，做鴨具備嘅條件其實好坎坷……「第一個條件要窮，人生活要錢，冇錢就咩都做得出，只要唔係作奸犯科就Okay，所以當你冇錢，你就會為錢而做鴨。

第二，要冇自尊。雖然大家都有幻想過做鴨，我自己都幻想過，但去到尾，一個男人都係會有返男人嘅尊嚴，並唔會因為覺得做鴨好嘆、又或者好有挑戰性等等原因去做，當你個人冇咗自尊，先會甘心去做鴨。」

後話︰

Mean娜重遇呢位10年冇見嘅師兄，老老竇竇真係感觸良多，由一個校草，變成喺螢幕下任睇任摸嘅鴨王，有人可能會覺得Dominic係靠賣肉上位，但梁朝偉除衫又冇人講？有幾多人會識得尊重一個演員嘅敬業精神？即使Dominic露胸又露股，但佢清楚知道自己所做嘅都係為「專業」兩個字。

最後，相信不少Gentlemen都想知，Dominic在《鴨王》預告片中所作嘅「舌頭功」練習係咪真係Work？Dominic話你知，「舌頭功」所作嘅練習係冇可能做到嘅事，請大家唔好亂咁模仿，以免黐咗條脷筋，敬請留意。

特別嗚謝︰

Andy Dark借出場地

CLASSROOM

地址：荃灣柴灣角街84-92號順豐工業大廈28樓B室
電話：3563 7983

facebook 
https://www.facebook.com/sirandydark
Instagram 
http://instagram.com/andy_dark/# 
YouTube 
http://www.youtube.com/sirandydark