Photos: R.M. Sotherby

自從有咗My乜乜Super之後，好多玩經典車嘅巴打，都睇返大台啲舊劇集。係唔係啲劇情正到要嗒完又嗒就唔知，淨係聽到佢哋間中又話：「原來阿乜乜乜，後生喺嗰套劇揸過部乜乜乜呀！」「又或者，梁朝偉喺《天降財神》中咗六合彩之後，第二朝就去灣仔萬事得陳列室，買咗部第一代RX-7！」

而我聽得最多嘅，要算係：「孻叔（周潤發）送比杰仔嗰部豐田（Toyota）MR2好靚呀！」

原來都有唔少車迷鍾意韓彬部日產（Nissan）280ZX，金色車身嘅，係棍波定自動波，我已經冇印象，淨係記得由任達華飾演嘅韓彬，好乞人憎，想窩佢幾錘。

韓彬所駕駛嘅280ZX，屬於第二代Fairlady Z，又稱為S130。呢一代早喺1978年推出，一直生產至1983年，當S130停產之時，Fairlady Z/Z車系已累計生產咗100萬部，之後由代號Z31嘅第三代Fairlady Z接棒。

熟知嗰個年代日產汽車嘅巴打都知，日產喺北美同部份海外巿場，以得勝（Datsun）品牌賣車，當時香港既有日產，又有得勝，因而有「日產得勝，款靚車勁」嘅宣傳語句。

拍賣行R.M. Sotherby上月底喺美國，拍賣咗一部1982年嘅280ZX，嗰部車累計行咗約32000哩，即約50,000公里，5速手波，配備兩塊透光玻璃嘅T型車頂，終以19,250美元成交，即約15萬港元，就咁睇相，整部車質素唔錯，15萬買個80年代回憶，唔算太過份。

引擎方面，屬L28E型，L系列最早歷史可追逆至1965年，係日本第一代嘅單頂凸輪軸（SOHC）引擎，L28E配電子燃油噴注系統，最大馬力155匹/5200rpm，峰值扭力23.5kgm/4000rpm。

間中仲可以喺香港見到狀態唔錯嘅S130，希望車主繼續愛錫部車啦！