Photos: Twitter賬戶 いろは6@Kaz3647M3

Suzuki喺7月24日公布咗新一代Swift Sport（香港車迷稱為「辣椒」）嘅圖片，一張咁大把，冇內櫳，的確有啲吊癮，令人唔多「Gur」。

日前有日本Twitter用戶，喺佢賬戶上載多幅聲稱係Swift Sport日本版小冊子嘅印刷品圖片，睇圖片嘅版面設計同圖片解像度，唔似係「自已老作」，睇嚟好大機會真係由廠方授權第三方製作，亦有網民話：「9 x 9係Suzuki自己放料啦，扮晒嘢！」

唔緊要，話知你邊個鬼打鬼或「咋唔知」。

睇睇張前座桶型座椅，唔錯喎，但未見有Recaro字（唔好笑，Alto Works都有啦！）。儀錶板方面，引擎轉數錶紅底字盤，幾得喎，速度計就碳灰色字盤再襯以紅色外圈，兩個錶中間就係Turbo增壓錶，約有大半個紅色圓圈，當中細分5格，右下個有個渦輪扇葉細logo，我知我知，好似細路仔咗少少，妖！有乜所謂啫，好feel嘛。

綜合幾位日本行家情報，Swift Sport日後喺日本售價約由185萬日圓至240萬日圓，視乎你揀幾多option，聞說聖誕節前後喺日本公布，2018年元旦假期後正式開售。