Photo: BMW Press

第三代MINI John Cooper Works Convertible日前公布詳情，廠方預計喺三月底先喺紐約車展公開展出，短期內開售，而家有feel，收車嗰陣可能都已經係夏天，都係嗰句：啱就埋位入票落訂。

本來呢，John Cooper Works只應有硬頂版，唔應該有開篷版，甚至Clubman版。不過，年代唔同咗，廠方已經視John Cooper Works為每個車型嘅最高性能級別，以往唔會喺John Cooper Works出現嘅自動波箱，而家一樣有，咁樣係好定唔好，由你自己判斷。MenClub都係好鍾意John Cooper Works推出初期嗰份堅持同態度。

買呢類衍生自掀背車嘅開篷車，最怕車身重，不過，開篷車例牌要作較多車身補強，換言之，揀得就預咗，新MINI JCW Convertible，車重1310kg，比上代重咗135kg，而比今代JCW硬頂版，亦重咗105kg，0至100km/h加速為6.6秒，喺今日嘅標準，唔算好快，比中規中矩好少少咁啦！

見到呢個編號「37」，印有「33 EJB」車牌嘅紅色袋，

就即時想起1964年蒙地卡羅（Monte Carlo）越野賽嗰部冠軍MINI仔

2公升直四Turbo引擎最大馬力231匹，峰值扭力32.6kgm，有6前速棍波同6速自動波選擇，呢隻稱為Rebel Green嘅車身顏色，幾冷門，但同MINI幾襯，如果對英國賽車歷史唔係完全毫無認識，一定會認同Rebel Green其實同為人熟悉嘅British Racing Green（BRG）非常相似，畀在我，一定繼續叫BRG。

18秒開閂軟篷（30km/h內可操作）肯定係例牌嘢，215公升行李艙肯定唔及硬頂版咁闊落（打開篷曬太陽，空間降至160公升），但咁又有乜所謂。買得開篷MINI，兼要揀JCW，你唔係同我講，你想部車好似Clubman咁實用啊嘛？你唔係同我講，你收車嗰日，15分得番幾分喺手，準備要上駕駛改進課程，啊嘛？

突然間好掛住1996年嘅Classic Mini Cabriolet添！