華為主打年輕人市場嘅nova系列推出新機nova 3及nova 3i，兩款新機將會喺8月17日於香港發售。同樣配備華為自家Kirin 970八核心處理器嘅nova 3被外界稱為平價版P20，佢除咗有2,400萬像素黑白及1,600萬像素彩色雙鏡頭外，仲有GPU Turbo圖像處理加速技術。

喺華為嘅手機產品線中，P系列係主打產品，Mate系列就專攻商務客人，而nova系列就係為主打年輕人市場。華為新出咗兩款新機nova 3及nova 3i性能相近，其中nova 3屬於規格配置較高嘅一部，佢配備雙f/1.8大光圈嘅2,400萬像素黑白及1,600萬像素彩色雙鏡頭；搭載華為自家Kirin 970八核心處理器，内置NPU專用硬件處理單元；內置6GB RAM及128GB記憶容量。

nova 3i配備1,600萬像素及200萬像素雙鏡頭，前者主要負責成像後者負責景深；新機亦首度採用新一代Kirin 710人工智能處理器，配合全新DSP專門加強圖像及AI拍攝表現；內置4GB RAM及128GB記憶容量。

nova 3及nova 3i前置鏡頭特別加入AI場景識別技術，可以話係呢兩部機嘅主要賣點。喺自拍時AI技術會判斷背景與人像關係，並且可以識別包括藍天、沙灘、綠色植物、夜景、舞台、花、室内及雪景8種場景。另外兩部新機都內置3D Qmoji自拍功能，可以透過前置鏡頭檢測面部表情變化造出各種3D貼圖及短片。

nova 3及nova 3i加入咗GPU Turbo圖像處理加速技術，令手機有更高畫質、更流暢及慳電嘅手機遊戲體驗。

華為nova 3及nova 3i兩部機拎上手除咗握感唔錯之外，屏幕大得嚟畫質亦不俗，因為兩部機同時採用新一代6.3吋的19.5：9全屏幕。另外，兩部機亦同時加入咗識漸變嘅藍楹紫色，呢款新色隨手機郁動時顏色會隨之變化，喺陽光之下就更靚。兩部機由8月17日起於香港發售，nova 3備有藍楹紫、相思紅及亮黑色版本，售價為$3,880；nova 3i備有藍楹紫、珍珠白及亮黑色版本，售價為$2,580。