Photos: Panasonic U.S./Samsung U.S./U.S. EIA

近10年成日講，手機、電腦令愈來愈多人唔再花時間睇電視、更可能唔再Keep咁多部電視。已往一屋兩廳三部TV嘅日子已愈嚟愈少有。 

睇你識咗邊類朋友啦，有啲巴打嘅情況啱啱相反。

而家啲新款電視薄咗咁多，慳位咗咁多，又可以當Mon用，而且平到兩、三千蚊（日本牌子，兩千頭已買到32吋，如果唔嫌「標清」嘅話）就有交易，正所謂「買嚟擺」都抵。

美國能源資訊署（U.S. Energy Information Administration；EIA）今年初發表調查報告，指美國家庭平均擁有電視數量由2009年嘅2.6部，降至2.3部。

「多TV族」家庭（泛指3部或以上）嘅百分化，從2009年，即金融海嘯發生後翌年嘅四成半（44%），下跌至不足四成（39%）。

值得留意，「無TV族」百份比，由2009年嘅1.3%升至2.6%，睇數字，條數仲係好濕碎，但6年翻一倍，足以證明「無TV族」嘅抬頭，話唔定6年後，再翻一番。

「1部起，2部止」嘅家庭方面，百分比反而有所增加，由2009年嘅54%升至2015年嘅58%。

喺「每周睇電視時數」，美國家庭由60小時降至56.8小時，攤開計，即係每日睇成8個鐘？我諗喺香港，冇幾多人放咗工仲有時間坐定定睇8粒鐘，淨係開住部機8小時齋聽聲都唔會。