Photos: GPO Retro

好多喺70年代末至80年代仲係後生仔嘅男人，包括我老豆，都曾經托住部「手提卡式機」（Portable Cassette Tape Player）去沙灘或沙灘就近嘅燒烤場「爆機」，呢啲「手提卡式機」有個好大嘅喇叭，用家通常都會播啲當時最流行嘅快歌，總之成個沙灘就好嘈啦。 

呢批巴打而家雖然年紀大咗，耳仔冇以前咁靈敏，聽歌嘅音量亦細咗好多，但個心仲好掛住呢類Boombox。講老實，我老豆幾年前同我講過：「樂聲（National）同先鋒（Pioneer）仲有冇出『沙灘機』？想買部新嘅放喺屋企用。」 

哈哈！Boombox機迷真係長情。

專門生產懷舊唱盤、卡式機、撥盤電話及相關配件嘅英國品牌GPO Retro，最近發表名為Brooklyn嘅新型號，即係80年代初、中期好流行嘅Boombox。 

佢配兩個40 watts嘅喇叭，訊源方面，除咗有DAB數碼電台廣播及FM電台外，

另有支援錄播嘅卡式帶（Cassette Tape）機、頂置式CD機（可以播碟同燒碟），輸入端子方面，有RCA、3.5mm同USB（支援錄、播），用家亦可自行接駁外置喇叭。更重要係有藍牙功能，可以接駁手機或Tablet。

控制方面，有得調校左右平衡、高音及低音。最過癮係有埋閃閃吓嘅VU顯示燈同雙天線。專用電池充電時間約1.5小時，每次可用約4小時，10kg重，夠份量喇呱。今年10月起發售，199英鎊，還可以啦！

如果Panasonic或Pioneer限量復刻部份80年代Boombox，你估fans會唔會爭崩頭？