最近搞IPO嘅小米散戶認購反應冷淡，梗係要搞返啲嘢催一催谷！喺內地一早發佈咗嘅小米8、紅米6，琴日正式喺香港發佈，小米8(6GB+64GB)售價由港幣$3,399起，而紅米6元(3GB+32GB)由港幣$999起。 

介紹返先，作為小米8週年嘅代表作小米8，係全球首部搭載雙頻GPS嘅智能手機，相比單頻GPS手機實測準確度提高3至5倍。小米8採用咗1200萬AI變焦後置雙鏡頭，處理器為Snapdragon845，提供藍色、金色及黑色。6GB+64GB售價為港幣$3,399，6GB+128GB售價為港幣$3,699。

嚟到售價親民嘅紅米6，小米指出紅米6係全球首部搭載12nm工藝製程處理器嘅千元機，配備咗後置1200萬+500萬像素雙鏡頭，仲有AI人臉解鎖功能。紅米6分別有粉紅色、金色、藍色及黑色，售價方面3GB+32GB為港幣$999，4GB+64GB為港幣$1,299。

小米8及紅米6將會喺7月6日發售，但兩部嘅黑色款就要等到7月下旬先有。