根據The Verge報道，喺美國東岸時間星期五早上5點42分，SpaceX利用Falcon 9火箭及Dragon Spacecraft向NASA國際太空站送出第15次補給，補給近6000磅，包括食物、水、科學實驗用儀器設備，而最特別嘅係補給中有一隻將會喺太空上生活嘅AI機械人。

呢隻AI機械人叫「CIMON」，佢睇落係一個有屏幕嘅波咁，而個屏幕Show住「CIMON」嘅卡通樣。由於太空係無重狀態，「CIMON」要移動唔需要安裝腳，反而安裝咗14個風扇，透過吸入太空站內嘅空氣嚟移動。

其實「CIMON」係由Airbus(空中巴士)為德國航天機構開發嘅AI機械人，並且喺重失重實驗飛機上進行過測試，而佢嘅語音控制嘅AI技術係由IBM提供，令佢可以同太空人互動。

來源︰The Verge