經過3輪嘅拯救行動，被泰國「睡美人洞」嘅13名少年足球隊成員已經全部救出！負責營救嘅泰國官員Narongsak Osottanakorn表示，由Tesla創辦人Elon Musk製造嘅迷你潛艇「野豬」喺技術及設備上都非常先進，但喺今次嘅拯救行動上並唔實用。先不論今次Elon Musk協助泰國拯救行動係咪一場公關Show，但佢的確身體力行咁去參與迎救，就算最後用唔著「野豬」潛艇仍然值得大家尊敬。

潛艇「野豬」雖然用唔著，但泰國總理都代表全國向 Elon Musk 致謝，同時佢此表示為相當感動。Elon Musk旗下SpaceX及Boring Company工程師製造嘅兒童體型迷你潛艇「野豬」，由設計到完成及進行測試都只係用咗8小時，製作過程雖然比唔上Iron Man喺山洞內製作Mark I 裝甲咁令人驚嘆，但仍然顯示出製作團隊嘅創意及執行能力。其實用唔著「野豬」潛艇並唔係一件壞事，起碼證明咗泰國嘅拯救行動進行得非常順利！

此外，Elon Musk到達泰國時亦都提及過「野豬」潛艇未必用得著，並指出「潛艇將會留喺泰國，以防將來有需要用到」。其實Elon Musk嘅出發點非常好，話唔定「野豬」潛艇會成為未來其他迷你潛艇製作嘅「原型」。而Elon Musk亦都恭賀一眾出色拯救人員取得成功。

Great news that they made it out safely. Congratulations to an outstanding rescue team!

— Elon Musk (@elonmusk) July 10, 2018