早前已經透露過三星8月9日會喺紐約舉行「Samsung Galaxy Unpacked 2018」，即係Galaxy Note 9嘅發布會。但係發布會未開始，三星新西蘭官網就率先流出咗Note 9嘅宣傳片，目前宣傳片已經被下架。Note 9嘅正面無用到M字額屏幕，而機背就比Note 8多咗指紋識別。

喺流出嘅影片中，出場嘅只有藍色Galaxy Note 9，其餘傳聞中嘅黑色及啡色都無露過面。從片中可以睇得到，Note 9嘅機面其實同Note 8無乜分別，亦都無用上大行其道嘅M字額屏幕，而機背亦都同上代Note 8差不多，有雙鏡頭系統，而多咗嘅就係指紋識別系統。

流出影片中透露咗幾個Note 9賣點，包括新S Pen將會有更強大嘅功能、全日嘅電池續航能力、達到1 TB嘅手機容量兼可以插Mirco SD卡。