中國科技巨頭騰訊噚日喺香港發布咗中期業績，雖然第二季收入按年增加咗30%，但喺手機遊戲業務方面表現強差人意，按年增長放慢至19%，按季更下跌19%。為咗扭轉困局，騰訊喺下半年會推出約20款遊戲，其中7款為騰訊代理嘅新遊戲，當中熱門遊戲《Fortnite》都會一併推出。

廣為一眾手機遊戲玩家熟悉嘅「食雞」遊戲《PUBG》喺中國雖然有推出，但受到早前薩德導彈事件嘅「限韓令」影響，令到有南韓公司知識產權嘅《PUBG》無辦法喺中國商業化賺錢，目前兩款喺中國嘅《PUBG》遊戲都只屬免費遊戲。

而中國對遊戲嘅監管亦影響咗騰訊嘅遊戲業務，因為中國喺監管機構改革之後，留意到有部份遊戲存在暴力及賭博內容，所以凍結咗唔少網絡遊戲版號及備案嘅審批。例如早前《Monster Hunter: World》喺騰訊遊戲平台WeGame上架後，喺4天19小時內被勒令下架。

為咗扭轉手機遊戲業務困局，騰訊除咗繼續努力將《PUBG》中國人版商業化，仲會為《王者榮耀》推出新嘅生存遊戲模式，以及推出高ARPU類新遊戲。而據了解，騰訊下半年將會推出類近《PUBG》嘅複雜版「食雞」遊戲《Fortnite》，以及獲HBO授權嘅戰爭策略遊戲《權力遊戲：凜冬將至》，其他遊戲仲有《天涯明月刀》、《彩虹六號》、《火影Online》及《全民冠軍足球》等。