為期3日嘅⾹港電競⾳樂節今日正式展開，電競節除咗有比賽睇之外，今年有近半展區設VR eSport試玩區域，以及舉辦VR eSport，證明電競已經逐漸由坐定定，演變至需要運用全身嘅真正運動。一齊睇吓場內有咩VR eSport玩！

喺電競節體驗專區中，其中最大展區「VIVE X ZOTAC VR ARENA」喺電競節期間會主辦第⼀個⼤型VR eSport⽐賽，以遊戲《英雄防線：勇士們(Front Defense: Heroes)》進行亞洲首個國際級別嘅VR電競賽事。

遊戲《英雄防線：勇士們》由VIVE工作室研發，係現時VR平台上最受歡迎嘅射擊遊戲，以第二次世界大戰為故事背景，遊戲中仲有機槍、機關槍、手榴彈、火箭筒等武器選擇。玩嘅時候，除咗要用手上嘅控制器瞄準進行射擊外，身體嘅左右移動，甚至踎低起身都可以幫助避開敵人攻擊，真係唔係傳統電競坐定定玩咁簡單。

今次由VIVE及ZOTAC舉行嘅VR電競比賽，採用咗背包型嘅電腦ZOTAC VR Go，配合由HTC提供嘅VIVE VR進行比賽，令到玩家可以唔洗戴住個連接電線嘅VR眼罩打機，比賽起身上嚟全身郁動都無有怕。

喺VIVE展區中都有唔同類型VR eSport提供試玩，包括射擊、乒乓波、足球等。同場嘅仲有Logitech及華夏網絡科技展出賽車及射擊等VR eSport。

飲品Monster都喺電競節帶嚟唔少靚女。