Game Boy絕對係80後嘅童年回憶，而最近有設計師就將呢部經典遊戲重生，仲命名為Nintendo Smart Boy向GameBoy致敬，突然間好想玩俄羅斯方塊呀！

Pierre Cerveau呢位意大利設計師似乎特別鍾意將懷舊元素加入手機，繼之前設計過用轉盤打電話嘅Macintosh Phone之後，今次就睇中任天堂嘅Game boy。以Game Boy為設計概念將遊戲機變成Smart Boy手機，Smart Boy機身用返Game boy嘅灰白色調，而且機背仲專登做返坑紋。

不過成個設計最特別之處，我就覺得係用換帶呢個方式嚟轉換容量、後備電源或鏡頭，第時想升級買盒帶就得，唔使成部機換都幾好。Smart Boy亦特別將microUSB同耳機介面放喺側邊，而咁樣嘅設計原來另有目的，係方便大家插手掣打橫打機，而且設計嘅手掣連埋電池，等你可以邊玩邊叉電。

至於做得「醒目仔」當然要用智能手機系統，睇系統介面就似係行Android多。雖然Smart Boy嘅概念真係唔錯，但唔知幾時先有機會變成實物，不過最近市面就有可以玩到紅白機遊戲嘅手提機，機身成個紅白機手掣咁，上面仲有埋芒兼可以直插紅白機帶即時玩得，大家上網搵下FC Pocket就得。

除咗FC Pocket之外，市面上仲有一款內置咗600隻遊戲嘅手提機，外型同FC Pocket好似，但掣位就改用鮮紅色。