由Rutgers University教授Javier Diez嘅團隊負責研究嘅The Naviator，採用四槳設計，佢最大點就係落水都可以繼續拍，水空兩用！The Naviator落水之後就機身就會打側，令螺旋槳可以幫助推進，大大提升水底勘察嘅效率，所以就連美國海軍都睇中，資助咗差唔多480萬港元，希望可以應用喺偵測洩漏油污同水雷嘅工作。目前The Naviator美中不足就係一定要有線先可以入水用，研究團隊希望出年夏天就可以解決呢個問題，完成空中同水底都可以無線控制。