就咁睇機身大家可能會覺得兩部差唔多，最明顯只係A6300機頂多咗4K logo。不過一拎上手就發現A6300比上代重手得多，事關今次機身用咗金屬框架，而且機身厚咗少少，拎落亦比較穩陣。至於新機viewfinder就由144萬像素升到240萬，望落都幾大分別，不過放大倍率就維持1.07x不變，而A6300就冇得好似上代咁90度向上反。

影像規格方面，2400萬新CMOS同埋4K拍片係A6300主要升級，不過最值得試其實係4D Focus對焦系統。因為A6300除咗支援425點相位對焦點之外，更有世界最快嘅0.05秒對焦。現場實試連拍同對焦都令人非常滿意，連拍施寶盛玩花式足球時，對焦點一定都可以lock到喺佢身上，唔會偏移，落電腦開相睇返亦張張中焦。另外，值得一讚係用live view連拍時，A6300比上代有明顯優勢，每張之間嘅blackout時間極短，而且仲有埋A7系嘅靜音快門添，可以話係Sony APS-C無反機最強機款。

A6300試測連拍110張

最後你問有冇吸引力令你升級換機呢？就視乎你有幾想用4K啦，如果本身已經有部A6000，用成8000換新機，我就唔會考慮喇，而且現場問過幾位用緊Sony機嘅用家，都話如果快門可以升級到1/8000的話就衝得過。若然想轉會或者出新機，A6300就係一個唔錯嘅選擇。