同往年一樣，唔少相機廠都搶喺Photokina開幕前發表新機，不過Olympus就留返開幕日先公布新機同新鏡頭。發表Olympus E-PL8、M.ZUIKO DIGITAL ED 25mm F1.2 PRO同埋M.ZUIKO DIGITAL ED 30mm F3.5 Macro。

今年Photokina都有唔少新機推出，而啱啱發表嘅Olympus E-PL8，雖然10月先會正式推出，不過我哋就借到返嚟，拎到上手同大家開一開包...裝，嚟一次開箱文睇下呢部新機。唔講唔覺，原來E-PL呢個入門級系列已經成兩年冇出新機，而事隔兩年先出E-PL8，新機既功能規格都同上代都係差唔多，仍然沿用1600萬像素CMOS，所以只係屬於小改款。

E-PL8繼續走輕巧路線，機身細細部，而可以180度向下反嘅自拍芒加上機身配色，一拎上手就覺得係女仔機。問過Olympus佢哋話上代E-PL7真係有唔少女仔支持，所以今代都想target女性用家。睇返E-PL8機身細節，又的確比上代精緻得多，除咗黑色同白色機身之外，我覺得手上呢部橙色最有懷舊feel，仿皮包圍上面仲印有金色「OLYMPUS PEN」標誌。

講到機身最明顯改動，除咗係手把位改細之外，就係機背多咗個拍片掣，唔使好似以前咁下下要入menu揀，而且反芒自拍時，篤下個芒就可以拍埋片，加上內置剪片功能，拍片真係影玩咗好多。另外，有玩過Olympus嘅人都知道佢哋嘅art filter特別靚，而新機就將特效介面重新設計，可以一次過preview晒全部效果，唔使逐個揀。

今次除咗借到相機試玩之外，仲借到M.ZUIKO DIGITAL ED 25mm F1.2 PRO同埋M.ZUIKO DIGITAL ED 30mm F3.5 Macro呢兩支新鏡頭。先講25mm 1.2光圈Pro鏡，換返35mm標準計即係50mm焦距，加上F1.2超大光圈，能夠拍出勁靚散景，可以話係目前最靚嘅M4/3人像鏡。至於30mm Marco呢支微距鏡，勁在有成2.5倍放大率，係同級鏡頭放大倍率最高既鏡頭，而最近拍攝距離係1.4cm，真係瞳孔都影得到，大家睇下面嘅試相就可以睇到效果。

試相區

Olympus E-PL8 $5090
M.ZUIKO DIGITAL ED 25mm F1.2 PRO $10190
M.ZUIKO DIGITAL ED 30mm F3.5 Macro $2490