塞車，係城市一定會遇到嘅問題。雖然近年各國都鼓吹綠色交通，希望市民多使用公共交通工具，其至係踩單車，不過對於已發展嘅大城市嚟講，執行起來仍有難度。Elon Musk最近喺twitter都提到塞車，更出埋tweet話要解決塞車問題，準備製作巨型隧道鑽挖機，要喺唔影響地面建築嘅情況下，興建地下隧道交通。

其實今年1時Elon Musk喺SpaceX管道列車Hyperloop嘅設計活動上，已經透露過呢個諗法，話過如果可以將隧道分層就可以解決到地面交通問題。今次佢終於嚟真，仲成立埋新公司「The Boring Company」，而「Boring, it's what we do.」就係公司口號。大家都知道boring係悶或者無聊咁解，但原來仲可以解為挖窿嘅意思。Elon Musk除咗出tweet證實之餘，仲專登喺profile加埋「Tunnels(yes, tunnels)」，睇嚟已經有晒計劃，令人期待日後公布詳情。

現為Donald Trump顧問團之一嘅Elon Musk，雖然曾公開批評過呢位美國候任總統，但經過一次和頭酒之後，似乎已經冰釋前嫌。至於Donald Trump曾話過會用1萬億美元嚟進行基建，當中包括重建美國嘅道路，話唔定呢個地下隧道交通計劃會得到美國政府支持，加快推出。