由於美國大選時有唔少假新聞喺facebook出現，更指假新聞影響選情，所以facebook近期都加強管制假新聞。雖然facebook已經做緊嘢，但德國政府就等唔切，事關出年就係德國大選，該國政府擔心選舉會被外國製造嘅假新聞影響，所以就決定推出應對方案。

德國政府法律部門表示︰「如果facebook同其他社交媒體唔移除假新聞同惡意言論，將會受到50萬歐元罰款。」雖然係有提到其他社交媒體都要罰，但社會民主黨議會主席Thomas Oppermann同《明鏡周刊》解釋只針對facebook。假如facebook被證實有假新聞而且24小時內冇處理，除咗會被罰50萬歐元之外，仲會被要求賠償受影響人士或團體嘅損失。