生成式AI整出黎嘅「AI美女」正在漸漸進入主流目光。除咗社交媒體上出現「AI美女KOL」、《Playboy》早前邀請AI美女擔任封面女郎之外，近日又有外國網站舉行全球首個「AI美女選美」，一眾「佳麗」除咗要鬥靚，仲要鬥「智慧」，贏家仲可以獲得10萬港元嘅獎金獎品。

AI評審之一Aitana Lopez

AI評審之二Emily Pellegrini

呢個「World AI Creator Awards（WAICA）」係由容許AI內容、內建AI聊天功能嘅訂閱式社交平台（即係類似OnlyFans嘅）「Fanvure」舉行，號稱係全球首個「表彰AI創作者嘅全球性計劃」，目前正接受全球「AI美女」，以及背後嘅真人創作者報名。而評審方面亦結合真人與AI，真人代表有美國選美歷史學者及作家Sally-Ann Fawcett、以及公關業人士Andrew Bloch。AI評審方面，就有Aitana Lopez及Emily Pellegrini兩位AI美女。

圖片：WAICA

但你又唔好以為呢個「選美」比賽真係整張靚女圖交上去就完事，事關據官網表示，四位評審會就「美貌」、「科技」以及「社交媒體影響力」三個項目評分，當中除咗會睇「參加者嘅外表、姿勢」，仲會睇下創作者如何使用「提示詞（Prompt）」創作出最精緻像真嘅美女，特別係手、眼及背景部份。另外AI美女「本人」亦要回答如「如果你可以許願令世界變得更好，你會許咩願」等問題，亦要睇下AI美女點樣於社交媒體上與Fans互動。其實都頗為全面。

往好處諗，就係獎品都算頗為豐富。奪得冠軍嘅美女（及其創作者），將會獲得$5000美元現金獎，一個價值$3000美元嘅「想像力教育課程」，以及價值$5000美金嘅公關品。亞軍及季軍亦可以分別獲得$5000及$2000美金嘅獎品。

資料來源：WAICA