Photos & Video：Aldous Lau

重鎚出擊吧

既然下定決心，不如再加多兩分肉緊，五萬蚊一隻5513（入門舊裝潛水勞），太輕手了，加多四萬，一隻霸氣得多的潛水勞：Ref. 1665 Sea-Dweller（SD），值得投資。

前期SD（1967年至1977年），因為錶面的「SEA-DWELLER」、「SUBMARINER 2000」兩行字為紅色，所以有「雙紅」（DRSD，Double Red Sea-Dweller，雙紅深潛）之稱，是舊裝勞迷的至愛；後期1665 SD，（1977年至80年代初），錶面字全改為白色，「Great White」，又取消了「SUBMARINER 2000」，變相自立門戶，不再屬於「SUBMARINER」。

當然，「九萬蚊」是入門價，只可以入手後期白深潛。

潛得更深

「610m/2000ft」潛水深度，在60、70年代，屬先鋒之作（一般潛水錶是300m）；設有放氦氣減壓氣閥；有日曆顯示，不過不設放大鏡；採用更厚更「拱」的膠錶面；40mm直徑，17.7mm厚，當時屬超大錶，「好蝦人戴」。最重要是，真的有人戴1665去潛水：一班來自法國深潛公司COMEX的潛水員。

兩行紅字．身價相差三四倍

好睇你的接受能力及購買力，由左到右，DRSD Mark II，$380,000；Ref. 1665，Year 1980，$93,000；Ref. 1665，Year 1977，$88,000；Ref. 1665，Year 1977，$93,000。（見下圖，旺角廣華街仁安大廈「Vintage Concept」）

變色二代．忽然發達

DRSD Mark II。雖然未有提供年分，不過據資料顯示，Mark II雙紅，生產年期是70年代初。Mark II面最大特色，是「變色」，有說由於早年錶面（及計時圈）物料/顏料「出現問題」、「質素不穩」，在正常佩戴情況下，會自然地變成啡色（所謂的Tropical Dial）。

當年，有錶主會拿手錶上Rolex維修中心投訴，「咁貴一隻勞，個錶面竟然變成咁！」（「壞面」錶），Rolex會免費為客人換上一片「烏卒卒」的「靚面」，而變了色的「壞面」，會「沒收」。亦有錶主可能覺得「冇所謂」，或者嫌麻煩，「變啡咪變啡囉」……恭喜你，Tropical Dial勞力士正是全球舊裝勞迷追捧的目標，你當日不去「換面」的決定絕對正確……

相信，只有勞力士先至可以造就出這種「壞面才是寶」的神話。

（見下圖，$380,000，旺角廣華街仁安大廈「Vintage Concept」）

三代似一代．退而求其次

DRSD Mark III。因為Mark III錶面layout似Mark I（尤其皇冠形狀；另外，Mark III面的「SUBMARINER 2000」字體比「SEA-DWELLER」略細，Mark I是兩行紅字字體大細相同），要知道Mark I有幾罕有，有幾難搵，相對上，Mark III絕對值得入手（如果碰到一隻又靚又合眼緣的話）。今次借來拍攝的一隻屬極罕「紙、盒全齊，對期，加殼肥面靚粗字圈片」。

（見下圖，$460,000，尖沙咀中間道遠東大廈商場「小時候」）

最抵玩．見到要買

DRSD Mark IV。不追求年分，尾期雙紅算抵玩。錶面皇冠最清晰，五支火分得好開，識睇的，會一眼出是Mark IV，又如何呢，始終橫看掂看都是一隻雙紅，雙紅喎，貴過一隻玫瑰金Daytona！

（見下圖，$290,000，尖沙咀中間道遠東大廈商場「小時候」）

各有好處．如何抉擇

買（玩/儲）舊裝錶，同買新裝錶，分別好大。買隻新款新裝勞力士，去錶行、專門店、金行買（當然，近期興去日本買），全部公價，幾個巴仙折扣，幫襯邊間好？是但啦，反正隻隻一樣，同去麥當勞食個餐，去UNIQLO買件UT一樣，全無購物樂趣。

買舊裝錶就大不同，正如我想搵隻白深潛（Great White），預十萬蚊budget左右，去到錶舖，好了，有錶睇（其實不是間間舊裝錶鋪都有你想要的錶款）。揀，當然是有得揀，用十倍放大鏡任驗，再開埋底蓋都得；講價，亦有少量講價空間，當中，最緊要同老闆混熟；睇落，好似好易成事……錯，大錯特錯，因為，要計算埋「眼緣」因素。要知道，所有舊裝錶已經絕版，而且買少見少，在市面流通的，每一隻的condition都不同，condition影響賣相，賣相可怕，令人卻步。所以，回歸原點，首先要「接受二/易手錶」。

雙紅之下．我要通渠面

何謂「通渠面」（Rail Dial）？

睇下圖，留意錶面最底兩行英文字，「SUPERLATIVE」與

「CHRONOMETER」之間、「OFFICIALLY」與「CERTIFIED」之間的空隙，上下剛好對正，形成一條「通道」！

但凡講「通渠面」，一定是講White 1665 Sea-Dweller，因為另一款擁有通渠面layout的勞力士，是COMEX 1665，有個「COMEX」字在錶面，屬於另一個世界！

雖則天價COMEX 1665有「通渠」特色，不過其細節位，例如皇冠形狀，寫上「600m」而不是White 1665的「610m」等，所以將White 1665說成是沒有COMEX的COMEX面，不太恰當。

何解會有通渠面？相信，（可能）只有COMEX 1665錶面供應商Stern Company自己先知（1977至1979年間）。

（見下圖，$145,000，尖沙咀中間道遠東大廈商場「小時候」）

（待續）